सर्व मोटारी बदलणार; ६ किलोमीटरची मेन रायझिंग पाइपलाइन नव्याने उभारणार, माढ्यातील शेतकऱ्यांना मोठा दिलासा
माढा : माढा विधानसभा मतदारसंघातील शेतकऱ्यांसाठी महत्त्वाच्या असलेल्या सीना-माढा उपसा सिंचन योजनेच्या दुरुस्ती व नूतनीकरणाचा मार्ग मोकळा झाला आहे. योजनेतील तब्बल २१ वर्षे जुनी यंत्रणा बदलण्यासह सर्व मोटारी बदलणे आणि सुमारे ६ किलोमीटर लांबीची मेन रायझिंग पाइपलाइन नव्याने टाकण्यास नियामक मंडळाने मंजुरी दिल्याची माहिती आहे.
मुंबई येथे जलसंपदा मंत्री राधाकृष्ण विखे पाटील यांच्या अध्यक्षतेखाली झालेल्या नियामक मंडळाच्या बैठकीत सीना-माढा उपसा सिंचन योजनेच्या दुरुस्ती व नूतनीकरणाबाबत सविस्तर चर्चा करण्यात आली. या बैठकीस माढा विधानसभा मतदारसंघाचे आमदार अभिजीत पाटील उपस्थित होते. बैठकीत जुन्या यंत्रणेच्या पुनर्बांधणीस मंजुरी देण्यात आली.
सीना-माढा योजना माढा विधानसभा मतदारसंघातील शेतकऱ्यांसाठी महत्त्वाची सिंचन व्यवस्था आहे. मात्र, गेल्या २१ वर्षांपासून योजनेतील यंत्रणा जुनी झाल्याने मोटारी, पंपिंग व्यवस्था आणि पाइपलाइनच्या कार्यक्षमतेवर परिणाम होत होता. त्यामुळे अपेक्षित क्षमतेने पाणी उपसा करून ते शेतीपर्यंत पोहोचविताना अडचणी निर्माण होत होत्या.
नूतनीकरणाच्या निर्णयानुसार योजनेतील सर्व मोटारी बदलण्यात येणार असून पंपिंग यंत्रणा सक्षम केली जाणार आहे. तसेच सुमारे ६ किलोमीटरची मेन रायझिंग पाइपलाइन नव्याने उभारण्यात येणार आहे. या कामामुळे योजनेची कार्यक्षमता वाढून शेतकऱ्यांना अधिक नियमित आणि प्रभावीपणे पाणी उपलब्ध होण्यास मदत होण्याची अपेक्षा आहे.
सीना-माढा योजनेच्या दुरुस्ती आणि नूतनीकरणासाठी आमदार अभिजीत पाटील यांनी सातत्याने पाठपुरावा केल्याचे सांगण्यात आले. योजनेची सद्यस्थिती, जुन्या यंत्रणेमुळे निर्माण होणाऱ्या अडचणी आणि शेतकऱ्यांच्या पाणी प्रश्नाकडे त्यांनी शासनाचे लक्ष वेधले होते. नियामक मंडळाच्या मंजुरीनंतर आता प्रत्यक्ष कामाला सुरुवात होण्याची प्रतीक्षा आहे.
